حلت الفنانة أسماء جلال ضيفة على برنامج “معكم” تقديم الإعلامية منى الشاذلي ويعرض على قناة “cbc”.
وتطرقت أسماء خلال حديثها عن النجاح الكبير الذي حققه مسلسل “أشغال شقة” وشاركت بطولته الفنان هشام ماجد وعرض بموسم دراما رمضان 2024 وحقق نجاحًا كبيرًا ونسب مشاهدات مرتفعة، إلى جانب مشاركتها بفيلمين بموسم أفلام عيد الأضحى هذا العام وهما فيلم “ولاد رزق 3: القاضية”، وفيلم “اللعب مع العيال” في تعاونها الأول مع المخرج الكبير شريف عرفة، إلى جانب مشاريعها الفنية خلال الفترة المقبلة، وعلاقتها بنجوم ونجمات الوسط الفني.
أسماء جلال تكشف الكثير عن مسلسل “أشغال شقة”
وعن مسلسل “أشغال شقة” قالت: “أول ما قالوا أني هعمل مسلسل كوميدي مع هشام ماجد وأستاذ خالد دياب، حسيت إن أنا الحاجة اللي هبوظ المسلسل، لأن هشام دمه خفيف أوي وأستاذ خالد دمه خفيف أوي في الكتابة، وانا ببقى لذيذة ودمي خفيف مع أصحابي في القعدات القريبة، بس مش عارفة في التلفزيون هبقى عاملة ازاي؟، قلت طب هجرب وقعدنا وقلت له هي المواقف نفسها بتضحك ولا أنا اللي هضحك قالي لأ المواقف، قلت له يالا بينا وماكنتش عايزة الناس تكرهني، ولما قرينا السيناريو مع بعض ولقيت أن كل حلقة في حد بييجي يساعدنا في البيت، وقلت انا معملتش كده قبل كده فيالا بينا”.
وأضافت: “المفروض في المسلسل تخنت أكتر من 80 كيلو، والبدلة كان المفروض تبقى أتخن من كده بحوالي 30 كيلو وبعدين صعبت تقريبًا على أستاذ خالد فقرر يخسسها شوية، لأن لما بتلبسي البدلة جسمك ما بيتنفسش بتفضلي لابسة طبقات فوق بعض وكل ده اسنفج، مع السليكون بيتلزق بكحول ووشك يصاب بالحكة طول الوقت مع اللغد بيفضل قافش في البدلة وبتبقي قاعدة مش طايقة نفسك وأي حركة ماكنتش بعرف أعملها لا بعرف أضحك ولا بعرف أزعل وكنت مش عارفة احرك حاجة لأنه كان هيقع”.
اقرأ أيضا.. انستاباي يستعد لإضافة خدمات جديدة.. أبرزها استقبال تحويلات المصريين بالخارج
وتابعت: “وكنت لما بمشي ببقى عاملة زي البطريق كأن عندي التصاق وكان ضغطي بيوطا أول ما بلبس البدلة، وأول ما لبستها فقدت الوعي، بعد كده تاني مرة جابولي عصاير وحاجات ساقعة وأغمى عليا تاني مرة برضه، وكنا بناكل أكل كتير بطريقة مرعبة وأنا تخنت في المسلسل فعلا، ومشاهد الأكل أستاذ خالد بجد بيحبها أوي وبيحب ياخدها زوايا مختلفة وكان بيعجبوا تعبيرات الوشوش، وفي حياتي العادية أنا بستمتع بالاكل بس مش باكل كتير ومباكلش أي حاجة وخلاص لازم الحاجة تبقى معمولة بمزاج”.
تشارك الفنانة أسماء جلال بعدد من الأعمال السينمائية المقرر عرضها خلال الفترة المقبلة منها فيلم “عودة شمس الزناتي” الذي تتعاون خلاله مجددًا مع الفنان محمد عادل إمام، وفيلم “الفستان الأبيض” وتشاركها البطولة الفنانة ياسمين رئيس.
