محسن محيي الدين يكشف عن علاقته بالراحل يوسف شاهين والنجمة داليدا
كشف الفنان محسن محيي الدين عن كواليس علاقته بالمخرج الراحل يوسف شاهين وتعاونهما بأكثر من عمل سينمائي حتى رحيله وعن العديد من الأزمات التي تعرض لها بسببه بالأخص بعد فيلم “اليوم السادس”.
محسن محيي الدين يكشف علاقته بالمخرج يوسف شاهين
وحل محسن محيي الدين ضيفًا على برنامج “واحد من الناس” تقديم الإعلامي عمرو الليثي ويعرض على قناة الحياة، وتحدث خلاله عن علاقته بالنجمة الراحلة داليدا ومشاركته لها بطولة فيلم “اليوم السادس”، إلى جانب السبب وراء ابتعاده عن الساحة الفنية خلال الفترة الماضية.
وعن علاقته بالمخرج يوسف شاهين قال: “كان عايزني ألعب شخصية القرداتي بشكل زي قناوي، وأنا عايز أخرج بره الموضوع ده، ويوسف شاهين عشان بيحب التمثيل أوي بيحاول يطلع موهبته هو كممثل في الممثل اللي قدامه”.
مضيفًا: “عشان كده كان أغلب الناس بيقولوا كل الممثلين بيمثلوا زي يوسف شاهين، وكان فيه خلاف بيني وبينه في حكاية الشخصية وتناولها، وأنا كنت في إسكندرية حر وكل ما كان يشوف موهبتي يحاول يخرج إحساسه التمثيلي فيا أكتر وبقيت مثلا في وداعًا بونابرت متكتف أكتر”.
محسن محيي الدين يوضح حقيقة خلافه مع يوسف شاهين
واستكمل: “بعد كده قلت له لأ أنا مبقتش مرتاح بقيت حاسس اني بعمل مجهود عشان خاطر أعمل الشخصية وأنا بالنسبة لي أهم حاجة أني لما ألعب الدور أبقى مبسوط ومرتاح، ورشحني بعد اليوم السادس في أفلام كتير زي المهاجر واعتذرت عن كل أفلامه”.
وتابع: “لأن كل مرة يبعت لي حد كان يقولي لو وافقت ممكن يوقف ويعيد التصوير من تاني وأقوله لا شكرًا مش عايز اشتغل، وبحب وأنا شغال أبقى حر حتى لما جه في فترة طلع عليا أني محتكرني، وهو شاف إن عندي معاناة مع إسكندرية ليه؟، وقولت له بعدها إنت ضرتني”.
علاقته بالنجمة العالمية داليدا وكواليس “اليوم السادس”
أما عن علاقته بالنجمة الراحلة داليدا وكواليس تعاونه معها بفيلم “اليوم السادس” قال: “أنا اتعرفت على داليدا من أيام إسكندرية ليه؟ ووداعًا يا بونابرت، لأن هي كانت صاحبة يوسف شاهين جدًا، وكان لما بنروح مهرجانات كانوا يتقابلوا مع بعض وأنا ببقى معاهم، وفي مرة عزمتني في بيتها وقعدنا نرقص مع بعض قبل ما نعمل اليوم السادس”.
واستكمل: “وبعدين لما جينا نعمل اليوم السادس دربوها على اللغة العربية وهي كانت ست جميلة خالص متحسش بعقد بتاعة إنها نجمة وإنها لازم تبقى من كوكب تاني بالعكس كانت بسيطة جدًا وحبوبة جدًا وكل الناس بتحبها وماكنتش حاسة إنها نجمة حتى كمان تأثرت أوي لما جت مصر وكانت بتاكل فول وطعمية الحاجات بتاعتنا دي والبامية”.
اقرأ أيضًا.. الزمالك يرحب بمشاركة زيزو مع منتخب مصر في أولمبياد باريس
وأنهى حديثه قائلا: “هي كانت حاسة إنها مصرية خالصة، حتى لما كان فيه افتتاح الفيلم في شبرا كان يوسف شاهين عاملنا عربية مكشوفة وزفة وعدى تحت بيتها اللي كان في شبرا وقتها وكانت الناس بتتهافت عليها والجاردات كانوا بيحاولوا يبعدوهم عنها وهي كانت بترفض وكانت حابة ان الناس تبقى حواليها وبتحاول تحتضنهم فكانت بني ادمة جميلة خالص”.
وعاد الفنان محسن محيي الدين للساحة الفنية بعد غياب سنوات وذلك من خلال مشاركته بمسلسل “المرافعة” بطولة الفنان الراحل فاروق الفيشاوي عام 2014.
يذكر أن اخر مشاركات محسن محيي الدين كانت بمسلسل “المداح: أسطورة العودة” الذي عرض بموسم دراما رمضان 2024.
