علق الفنان أشرف زكي نقيب المهن التمثيلية، على قرار النيابة العامة بإخلاء سبيل فرد الأمن الذي دخل في شجار مع الفنان الراحل تامر ضيائي قبل لحظات من وفاته بمستشفى الثدي التابعة للمعهد القومي للأورام.
وأكد أشرف زكي خلال مداخلة هاتفية ببرنامج “يحدث في مصر” تقديم الإعلامي شريف عامر ويعرض على قناة “Mbc مصر”: “حق تامر ضيائي مش هنسيبه ونسعى في كل الطرق عشان نجيب حقه”.
وكشف أشرف زكي عن تشكيل لجنة قانونية بنقابة المهن التمثيلية للتعامل مع وفاة الفنان تامر ضيائي مضيفًا: “المشكلة دلوقتي في زوجته لإنه كان العكاز اللي بتتسند عليه بس احنا معاها ومش هنسيبها”.
وكان الفنان الراحل تامر ضيائي بصحبة زوجته ودخل في شجار مع أحد أفراد الأمن المتواجدين بالمستشفى لمحاولته الدخول من أجل جلسة الكيماوي الخاصة بها وبعد تهدئته وقع مغشيًا على الأرض بصورة مفاجئة.
اقرأ أيضا.. “كده عملت مقلب في نفسك”.. رواد السوشيال ميديا يسخرون من رامز جلال لهذا السبب
تشييع جثمان الراحل تامر ضيائي
شيع جثمان الفنان تامر ضيائي من مسجد السيدة نفيسة ظهيرة اليوم الخميس عقب أداء صلاة الجنازة على الجثمان، وحرص عدد كبير من نجوم الفن والأهل والأصدقاء المقربين من الفنان الراحل على الحضور وتقديم واجب العزاء وهم الفنان حمزة العيلي، الفنان محمد علي رزق، الفنان أشرف زكي، الفنان أحمد صفوت، الفنانة لقاء سويدان، الفنان منير مكرم، الفنان وائل عبد العزيز.
وأعلن الفنان محمد علي رزق خبر وفاة الفنان تامر ضيائي عبر حسابه الرسمي على “فيسبوك” وقال: “لا حول ولا قوة إلا بالله، صديقي وأخويا الكبير عشرة عمري تامر ضيائي في ذمة الله، الله يرحمك يا تامر ويجعلك من اهل الجنة ويعوضك عن تعبك في الدنيا، نسألكم قراءة الفاتحة والدعاء له بالرحمة والمغفرة”.
وصية الفنان تامر ضيائي
كشف الراحل تامر ضيائي عن وصيته بعد تعرضه لأزمة صحية خلال الفترة الماضية، وكتب: “بوست الوصية، ده هيفضل باين على صفحتي لحد ما أموت، الحقيقة اللي كلنا عارفينها ومتأكدين منها أننا كلنا ربنا كاتب لنا إننا نموت في ميعاد محدد غير معروف، وعشان كده كتبت الكلام ده لأني محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفة، ووقتها طبعًا مش هعرف أقولها لحد”.
وأشار الراحل تامر ضيائي في وصيته لـ 10 نقاط هم:
1- صلاة الجنازة أهم من العزاء وهي اللي كل ما العدد زاد كل ما ثوابي ما كان اكتر، فأرجوكم تصلوا عليا.
2- مش شرط تيجي العزاء وياريت لو يتعمل في البيت أو مكان بسيط بفلوسه تطلعولي صدقة جارية أفضل.
3- من فضلكم لم يثب أو يتفق عليه عمل ختمة قران للمتوفي إنها هتوصله، بس مثبت إن الدعاء والصدقة بيوصلوا للميت، فرجاء دي بالذات بلاش وادعوا لي الوقت اللي هتقروا فيه جزء فضوا نفسكم وأقعدوا أدعوا فيه.
4- بلاش صدقة جارية تقليدية وسهلة ومش مستفاد بيها يعنى المصاحف كتير في مصر أوى وكل بيت فيه كتير فممكن نحط الفلوس فى جامع بيتبني أو كرسي متحرك في مستشفى يستفيدوا بيها المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة”.
5- دي نقطة مهمة أوى بالنسبة ليا.. محدش يقول لحد بتعيط عليه ليه، ومتعيطش عشان هو بيتعذب!! الكلام دة غلط، سيبوهم يعيطوا لحد ما يطلعوا كل الشعور اللى عندهم ومفيش حاجة بتقول إن العياط معناه عدم رضا بقضاء ربنا “وابيضت عيناه من الحزن فهو كظيم”.
6- أهم حاجة تاني هي الدعاء وبس والصدقة”.
7- من فضلكم تكثروا الدعاء وقت نزول القبر وتتصدقوا بأي حاجه بنية إن ربنا يجعل قبري روضة من رياض الجنة ويثبتني عند السؤال لأن ده أهم وقت ليا وياريت كمان بعد ما تدفنوني أقعدوا معايا شوية ومتستعجلوش تمشوا عشان تونسوني في ليلة زي دي”.
8- الموت علينا كلنا حق وإحنا كلنا أمانات ربنا وهيردنا تاني، فالحزن على الفراق هونوا على نفسكم بالدعاء ليا عشان أبقى في سعادة لحد ما أقابلكم تاني”.
9- اللي بيحبوني يدعولي كتير عشان لو مفيش حد يدعيلي”.
10- دي مهمة أوي عاوز الكل يسامحني على أي حاجة عملتها فيه بقصد أو بدون قصد”.
يذكر أن اخر مشاركات الراحل تامر ضيائي كانت بمسلسل “فراولة” بطولة الفنانة نيللي كريم وعرض بموسم دراما رمضان 2024.
