ميدو يعتذر عن تصريح “لن أشجع الأهلي في كأس العالم”
تسببت تصريحات ميدو عن الأهلي بكأس العالم حالة من الجدل الكبيرة مؤخراً، حتى وصل الأمر بأن يعتذر أحمد حسام ميدو عن تصريحاته بخصوص تشجيع الأهلي في كأس العالم.
وأكد ميدو أنه يعتذر عن تصريحاته بأنه لن يشجع الأهلي في كأس العالم للأندية المقرر إقامته العام المقبل في أمريكا.
ميدو يعتذر عن تصريحاته بعدم تشجيع الأهلي في كأس العالم:
وقال ميدو عبر حسابه الرسمي بمنصة إكس: “أنا ابن الزمالك وأكبر فخر ليا في حياتي إني ابن المدرج ابن الثالثة يمين بلعب في الزمالك من وأنا عندي ٩ سنين وأنا عيل صغير كنت بروح بفانلة الزمالك في المواصلات علشان الناس كلها تعرف إني ناشئ في الزمالك بطاقتي وأنا عيل صغير هي كارنيه اتحاد الكورة اللي مكتوب عليه اسم الزمالك”.
وأضاف: “تتلمذت على ايد مدربين عظماء علموني إني أنتمي لفريقي بس وما أشجعش أي نادي ثاني في مصر بالذات إلا نادي الزمالك أي كان بيلاعب مين ولكن في نفس الوقت اتربيت إني أحترم كل المنافسين وأهنيهم لو كسبوا وأباركلهم وأقولهم هارد لك لو خسروا.. هو ده معنى الروح الرياضية بالنسبة لي!!”.
وأكمل: “لما اتسألت في الاستوديو هتشجع الأهلي في كأس العالم للأندية رديت بطبيعتي دون أي نفاق أو كذب لأن بكل بساطة مفيش حاجه في الدنيا تستاهل إنك تكون كذاب ومنافق! “،
وتابع: “اتفق معاكم إن التوقيت ما كانش مناسب وبعتذر لأي حد زعل إني قلت الكلام ده في حدث مهم يخص النادي الأهلي وأن شايف الناس اللي زعلت بخصوص إن الوقت مش مناسب عندهم كل الحق”.
وأردف: “أما لو اتسألت مليون مرة هتشجع أي نادي تاني في مصر غير الزمالك إجابتي هتكون هي هي عمرها ما هتتغير لغاية لما أموت”.
اقرأ أيضاً ..أخبار الزمالك .. قرار جديد من جوميز مع الونش
استطرد: “أما بخصوص الهجوم اللي بتعرضله فأنا عاذر الناس لأنهم ممكن يكونوا اتعودوا على إجابات مختلفة في السنوات الأخيرة من ناس تصدروا المشهد في الإعلام وهما أكتر ناس بيأذوا المنافس في الخفاء وأكتر ناس بتتمنى من قلبها خسارة المنافس من جواهم”.
وأضاف: “مش هرد على أي حد هاجمني لأن بكل بساطة أنا في مرحلة في حياتي شايف إن مفيش حاجه في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس بالنسبه لي ماتتعداش أكتر من كده!!”.
وأتم تصريحاته قائلاً: “مره ثانية بعتذر إني كنت سبب في جدال قائم الأيام اللي فاتت للأسف مش ذنبي ولكن بسبب مدمنين الترند والدخلاء على كرة القدم اللي لا يمكن يفهموا أبدًا عقلية مشجع الكورة!!”.
